Joh 20 | BOJ | STEP | Yesus a subq di sonaq yori batiej. Nebeonaqa nobqolo ambru Maria Makdala qure qaji a tigelosiqa Yesus aqa subq gilej. Gilsiq ŋam atej meniŋ kobaquja sub me getenteb qaji di waqosiq taqalq di sonaq unej.

John 20

Yesus a olo subq na tigelej

1 Yesus a subq di sonaq yori batiej. Nebeonaqa nobqolo ambru Maria Makdala qure qaji a tigelosiqa Yesus aqa subq gilej. Gilsiq ŋam atej meniŋ kobaquja sub me getenteb qaji di waqosiq taqalq di sonaq unej. 2 Unsiqa olo puluosiq urur ti aisiq Saimon Pita wo Yesus aqa aŋgro bei agi a tulaŋ qalaqalaiyoqnej qaji a wo naŋgi aiyel itnjrsiqa minjrej, “Gago Tamo Koba Yesus aqa jejamu subq dena osib jaraionub. Qabia kio atonub di iga qaliesai.”

3 Degsi minjrnaqa Pita wo aŋgro de wo naŋgi anjam di qusibqa Yesus aqa sub unqajqa gileb. 4 Naŋgi aiyel gurgurosib giloqnsib aŋgro dena Pita buŋyosiqa namoosi gilsiq subq di brantej. 5 Osiq sub meq di tigelosiqa miligi tirosiq gara Yesus dalaeb qaji di sonaq unej. A sub miligiq aiosai. 6 Onaqa Saimon Pita a bunuqna urur ti bosiq brantsiqa a torei sub miligiq aiej. Aisiq a dego gara Yesus dalaeb qaji di unej. 7 Gara mutu bei Yesus aqa gate qoseteb qaji di dego lubosiq taqal beiq di sonaq unej. Gara mutu di gara qudei ti turtsi sosai. A segiq di soqnej. 8 Onaqa aŋgro bei agi namo subq di brantej qaji a dego sub miligiq aiej. Aisiq gara di unsiq endegsi poiyej, “Bole, Yesus a subq na tigelqo.” 9 Qotei aqa anjam bei nami endegsib neŋgreŋyeb unu, “Kristus a subq na tigelqas.” Bati deqa Yesus aqa aŋgro naŋgi anjam di poinjrosaisoqnej. 10 Ariya naŋgi olo puluosib naŋgo qureq aieb.

Maria Makdala qure qaji a Yesus unej

11 Onaqa Maria a sub qalaq di tigelesosiqa akamoqnej. Akamoqnsiqa sub miligi tirej. 12 Tirosiqa laŋ aŋgro aiyel sub miligiq di sonab unjrej. Naŋgi gara qat jigsib Yesus ŋeioteb qaji lumeq dia awesoqneb. Bei gateqsi bei siŋgaqsi awesoqneb. 13 Onaqa laŋ aŋgro aiyel naŋgi na Maria minjeb, “Uŋa, ni kiyaqa akameqnum?” Onaqa minjrej, “Naŋgi ijo Tamo Koba osib jaraionub. Qabia kio atonub di e qaliesai.” 14 Maria a naŋgi degsi minjrsiq bulosiqa aqa qoreq di Yesus a tigelesonaq unej. Ariya Maria a qaliesai, di Yesus.

15 Onaqa Yesus na Maria minjej, “O uŋa, ni kiyaqa akameqnum? Ni yai unqa bonum?” Onaqa Maria a are qalej, “Tamo endi mandam taqal endi taqateqnu qaji kio?” Degsi are qalsiq minjej, “O Abu, ni na kio ijo Tamo Koba osim sawa qabia atonum di merbimqa e gilsiy oqai.” 16 Onaqa Yesus na minjej, “O Maria.” Degsi minjnaqa Maria a Yesus qa poiyonaqa Yesus areiysiq minjej, “O Rabonai.” Di Hibru anjam. Aqa damu, “O Qalie Tamo Koba.” 17 Onaqa Yesus na Maria minjej, “Ni e ojaim. Di kiyaqa? E ijo Abu aqaq oqosaiunum deqa. Ariya ni ijo was naŋgoq gilsim endegsi minjre, ‘Yesus a marqo, “E ijo Abu aqaq olo oqwai. Ijo Abu agi nuŋgo Abu dego. Ijo Qotei agi nuŋgo Qotei dego.” ’ Ni gilsim naŋgi degsi minjre.”

18 Onaqa Maria Makdala qaji a Yesus aqa anjam di qusiqa a gilsiq Yesus aqa aŋgro naŋgi itnjrsiqa minjrej, “E gago Tamo Koba Yesus unonum.” Osiqa anjam kalil Yesus na minjej qaji di olo naŋgi sainjrej.

Yesus aqa aŋgro naŋgi na Yesus uneb

19 Ariya yori bati koboosiq bilaqtonaqa Yesus aqa aŋgro naŋgi siraŋme kalil qandimteleŋosib warum miligiq di soqneb. Di kiyaqa? Naŋgi Juda tamo kokba naŋgi ulainjreb deqa. Onaqa bati qujai deqa Yesus a tal miligiq di brantosiqa naŋgo ambleq di tigelosiq minjrej, “O ijo aŋgro, niŋgi are lawo na soqniye.” 20 Osiqa aqa baŋ ti jar baŋga ti naŋgi osornjrej. Onaqa naŋgi kalil Tamo Koba Yesus unsibqa naŋgi tulaŋ areboleboleinjrej. 21 Onaqa Yesus na olo minjrej, “Niŋgi are lawo na soqniye. E ijo Abu na qariŋbonaq mandamq aiem. Dego kere e na niŋgi qariŋgitqa gilsib ijo anjam mare mare laqniye.” 22 Yesus a na aqa aŋgro naŋgi anjam degsi minjrsiqa aqa mondor puynjrsiqa minjrej, “Niŋgi Qotei aqa Mondor Bole oiye. 23 Niŋgi tamo uŋgasari naŋgo une kobotetnjrqab di Qotei a dego naŋgo une kobotetnjrqas. Ariya niŋgi tamo uŋgasari naŋgo une kobotetnjrqasai di Qotei a dego naŋgo une kobotetnjrqasai.”

Tomas a Yesus unej

24 Yesus a naŋgoq di brantej di Tomas a naŋgi koba na sosai. Tomas a Yesus aqa aŋgro 12-pela deqaji bei. Aqa ñam bei Didimus. 25 Onaqa Yesus aqa aŋgro naŋgi gilsib Tomas itosib minjeb, “Iga gago Tamo Koba Yesus unonum.” Degsi minjnabqa a naŋgo anjam di qunaq ugeiyonaq minjrej, “E ijo ŋamdamu na Yesus aqa baŋ tutu na qameb qaji pirigi di unsiy ojqai di e marqai, ‘Bole, Yesus a subq na tigelqo.’ E aqa jar baŋga qaja na qameb qaji di dego unsiy ojqai di e marqai, ‘Bole.’ E unqasai di e bole qa marqasai.”

26 Ariya bati 7-pela koboonaqa Yesus aqa aŋgro naŋgi olo tal miligiq di soqneb. Tomas a dego naŋgi koba na soqneb. Siraŋme kalil qandimeleŋesonabqa Yesus a olo tal miligiq di brantosiqa naŋgo ambleq di tigelosiqa minjrej, “O ijo aŋgro, niŋgi are lawo na soqniye.” 27 Osiqa Tomas minjej, “O Tomas, ni ino baŋ gei na ijo baŋ bile qameb qaji aqa pirigi qamsim une. Ino baŋ waiysim ijo jar baŋga aqa pirigi dego oje. Areqalo aiyeltaim. Areqalo qujaitosim e qa ino areqalo siŋgilat.” 28 Onaqa Tomas a na Yesus minjej, “O Yesus, endego e poibqo, ni ijo Tamo Koba. Ni ijo Qotei dego.”

29 Onaqa Yesus na olo Tomas minjej, “Ni ino ŋamdamu na e nubsim deqa ino areqalo e qa siŋgilatonum e? Ariya tamo uŋgasari naŋgo ŋamdamu na e nubosaieqnub qaji naŋgi e qa naŋgo areqalo siŋgilatqab di naŋgi tulaŋ areboleboleinjrqas.”

Utru kiyaqa Jon na anjam endi neŋgreŋyej

30 Yesus a Qotei aqa maŋwa tulaŋ gargekoba aqa aŋgro naŋgo ŋamdamuq di yoqnej. Ariya e aqa maŋwa kalil deqa neŋgreŋyosai. Aqa maŋwa quja quja segi e buk miligiq endi neŋgreŋyonum. 31 Niŋgi ijo anjam endi sisiyosib Yesus qa nuŋgo areqalo siŋgilatosib a bole Kristus Qotei aqa Ŋiri degsi poiŋgwajqa deqa e na anjam endi neŋgreŋyonum. Yimqa niŋgi Yesus aqa ñam na ŋambile gaigai sqab.